Mi an souvien bien lo tan bann bazardyé téi port zot panyé dsi la tète pou pass kazankaz pou vann zot marshandiz. Panyé-la, sanm pou moin, sa lété lour é lo pli difisil lété pou mète ali di la tète. Inn foi k’li lété dsi la tète, lo bazardyé téi gingn porté-plis in késtyonn téknik k’in késtyonn fors –té vré galman pou poz atèr, bazardyé téi domann k’i ède ali. Si lo bazardyé té lo promyé pou fé l’éfor, demoun téi ède ali pou anshèv lo mouvman. Noré pa falu, li fé pa l’éfor lo promyé pars pèrsone nora pa ède ali. Kosa sa i vé dir ozis ? Sa i vé dir, si ou i gingn pa fé in n’afèr ou tou sèl, komans fèr é demoun va donn aou lo kou d’min k’i fo pou fé l’afèr ou la bézoin fé. Alé ! Mi domann azot pou rofléshi la dsi é ni artrouv pli d’van. Sipétadyé !