Zot i koné dopi k’mwin lé dsi la tèr, mwin lé toultan apré domandé par kèl boute i fo pran lé shoze, donk oussa i lé lo komanssman. Pou déssèrtin lé fassil réponde in késtyon konmsa : komansman sé komansman !

Aprann in lésson par lo komansman ! Mézami l’ariv amwin plizyèr fwa komanss aprann par la finission, sansa par l’milyé, sansa par in boute i ral amwin bien. Sansa ankor konm k’i gingn pars boudikonte néna ké lo rézilta k’i konte. I sifi d’gingn aprande.

Sa i rapèl amwin in zistoire lo sapeur Kamanbèr. Son groupe lé an korvé é li domande fiziyé Kankrola pou koupe in gro ta d’boi. Kankrola i koupe, i koupe mèm é finalman apré in bon koupe de tan, li fini par koupe la moityé lo ta d’boi. Kamanber i pass par la épi i di : fiziyé Kankrola ou lé pa malin ou la ! Si ou l’avé komanss par l’ote boute ou nora té fini oute travaye. Touzour komanss par l’komanssman ! Ni rotrouv.

Apré li sava, é dsi lo zimaze i oi lo pov Kankrola afalé atèr, fatigué vèye pa koman, apré domande anli même kèl koté i lé so famé komanssman k’i fé ké ou la fini oute travaye an dë tan, troi mouvman. Alé ! Mi kite azot rofléshi la dsi é ni artrouv pli d’van. Sipétadyé.

Justin