Gouvèrnman la Frans l’apré rode in tik-tak pou diminyé landètman lo péi. Pars, konm di lo kont, la Frans la pa otroman k’lé zot… li doi, li doi, ziska son fonn kilote. Koman li l’ariv la ? L’ané 2007, kan lo pti prézidan la pran lo pouvoir, la dète lété par-la troi pou san lo PIB, mé li la déside rabèss lo boukliyé fiskal pou pa pran tro larzan dann la posh bann gro vaza. Pou li, sa té in manyèr fé rant an Frans larzan lété déor. Mé, par l’fète, Johnny Halliday i pèy touzour son zinpo dan la Suisse, konm in bonpé demoun nana la fèss an or ! Donk lo kou la manké... sof ké la ankèss moin larzan z’inpo. Aprésa, lo shovalyé Sarko la vol o sokour bann bank té i sar tonm dann kanal la fayite, afors zot la amène zot z’afèr an sharète shaviré.

Mé pou fèr in n’afèr konmsa, li la anprète larzan. So kou isi, li doi si tèlman ké son dète i trap plis katrovin pou san son PIB... plish katrovin pou san la rishès lo péi, é son bidzé la dékaniy an konsékans. Lèr-la, l’Erop i gard ali gro zyé. L’èr-la, i di ali, tash moiyin dézandète in pé. Prézidan i di oui... so soir li di domin, domin li di so soir… lané proshène nou va oir. Mé an fass li, na poin solman marmay lékol, pars madam Mèrkèl, ou i pé fé ali bizou tank ou i vé, mé ou i roul ar pa li dan la farine. Komisyon éropéène lé parèy, i vèy aou konm lé dési lo fé. Momandoné, bann l’institi i suiv la dète i parl diminyé la note la Frans. Donk, so kou isi, la pi moiyin shapé ;

Ala ké konm in fakir, gouvèrnman i tir dan son shapo son règl an or pou ariv in zour ékilib son bidzé. Dizon sé lo foutèr d’fé ki vé étinn lo linsandi, é pèrsone i kroi pa li mèm si li zéstikil, li vien par isi, li pass par la-ba, li pran gouté avèk inn, manzé avèk l’ote, i anbrass par isi, i sokouy la min par la-ba, i pran foto. Mé lo majigador i marsh pi. La rob Fifine lé randi tro kourt, na poin moiyin pou ralonz ali. Alor, koz aou ! Kominik aou ! Boujé konm grandyab dann lo bénite ! Kome aou si ou i vé ! Kome aou tank ou i vé ! La kom i marsh pi !

NB : Dèrnyé nouvèl, gouvèrnman i sar fé la kète avèk bann rish... kont dési, mé fyé pa tro.

Justin