Fitintan piman lété pa shèr, mèm ou té i gingn ramas ali dann karo kann pars martin l’avé plant sa ékspré pou l’moun. Konm li téi plant brède morèl, lastron épi tout sort plant bien itil é pa shèr ditou. Koméla, la pi parèye : sé l’moun k’i plant piman dann in karo éksepré é sak té i doi arivé i ariv. Désèrtènn sézon piman lé bon marshé, d’ot li lé shèr. Pli pir ankor kan i fé l’inportasyon pars lo profi é l’éspékilasyon na pi arien a oir avèk lo pri d’rovien. Lo pri lé arbitrèr : li lé an rapor avèk sak in pé néna dannn z’ot posh konm l’éro é pi d’rapor avèk lo pri la kouté. Rézilta, tazantan piman lé shèr, bonpé shèr, é zour-la ou i pé apèl ali mésyé. Mésyé sé l’moun kapab ashté ali !