Matant Zélida la ékrir justin :
Mon shèr nové, mon spès salté, rouz-de-fon dovan l’étèrnité,
Vi lo bann rézilta zot, bann rouj-de-fon, la fé dann z’éléksyon, mi rokomann azot in tizane matrékèr. Sa i apèz lo batmann kèr épi sirtou ou i gingn fé in somèy normal. Mi pans ou i koné romarin ? Sa in tizane sézisman. Mi pans ou i koné galman do ronm avèk do sèl ? Sa lé vanté si ou la gingn in mové sirpriz. Nana galman sanzitiv, épi tout in tralé plant i pé fé tizane avèk ou sinonsa mète a fizé. Pou kosa mi di aou sa ? Pars, moin lé sir, dopi dimansh, ou daoir sirman in fonn shagrin. Ou i koné, in fonn shagrin-la, sa i mine aou par anndan, sa i atak out kèr, out pilor, out l’éstoma… ou lé mèm riskab gingn in kou d’san si ou i pran pa prékosyon.
A ! Mi koné bann moun la politik ; si zot i gingn, zot kèr lé an kèr d’solèy. Si zot i pèrd, zot i fini an défalké. Mi pans sé lo ka bann moun Parti kominis. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si ou té i égzis pa, noré fali invant aou, pars i spas dé shoz dan out tète la. I pé mèm di, la pa in dézèr fransé... Sa sé in konpliman mi fé aou ! Mé par l’fète, ou osi ou i doi pa ète an form ; pars la droite la pa gingn in bon rézilta non pli. Moin la mèm antann mésyé Didier déklar i fo in rofondasyon la droite. Mi trouv lo boug i oz ! Pars kan ou la gingn in zouzou, si ou i kas ali, ou lé résponsab, é ou tousèl. Bin Didier la kas la droite, pou gingn afayir Parti kominis. Mé li la obli in n’afèr, konm in pé i di : « Malèr d’sha la pa bonèr d’shien ». Pou konsol aou, m’a dir aou, mi doute pa la droite va rofé, mé pèrmète amoin dir aou, kominis osi va rofé. Tok ! Pran sa pou ou !

NB : Koméla, nana in bon pé liv si tizane bourbon. Dsi internet i mank pa. Tizanèr galman i mank pa. Solman, antansyon, in tizane i pran pa tor-an-travèr ; akout mon konsèy !

 Justin