In n’ote foi mi souvien bien kossa Paul Vergès téi vé dir kan li téi parl nout doub libérassion : libérassion nassyonal épi libérassion sossyal. Ni konpran bien kan li parl sa li di la mèm shoz Elie Hoareau i di.

Mwin pèrsonèlman mi panss inn é l’ote i fo zot i sava ansanm.I pé pa an avoir in libérassion sossyal si na pwin in libérassion nassyonal..i pé pa an avoir in libérassion nassyonal si na poin in libérassion sossyal Mi panss noute bann dirijan dopi lo promyé kongré nout parti l’avé krinte dë shoz : inn la pèr ni pass a koté nout libérassion sossyal, l’ote ni pass a koté nout libérassion nassyonal.

Bonpé péi lontan lété koloni La Franss la gingn zot lindépandanss mé san z’ète indépandan réèlman pars kolonyalism la fé mine sorte par la porte pou li rante par la fénète avèk a la klé in léshèk zot politik dévlopman épi la dominassion kapitalist épi néo-kolonyalist. Arzout èk sa linkapassité fé antann vréman zot voi dann konsèr bann nassion.

Astèr si ni parl in pé la Rényon épi si ni parl galman bann péi loutre-mèr, ni rann anou kont lo tan nou la mète kissoi pou l’égalité sossyal é boudikont léshèk bann politik dévlopman épi bann konba pèrdan pou l’égalité — konte la mizèr.

Kant a noute libérassion kiltirèl — nout parti i anparl déza dann son program 1959 — ni koné lo pri plizyèr zénérassion la péyé pou afirm nout kalité d’rényoné. In konba bien nésséssèr, in konba la bien avanssé mé i antrovoi pa ankor lo bout lo tinèl.

Mézami lo tan la passé. Défoi nou la avanssé, défoi nou la rokilé. Mé si nou néna la foi dann nout idé d’in doub libérassion, si ni garde sa konm boussol pou alé an avan, tardra viendra mé nou va avanss ti-pa ti-pa dann nout shomin kominiss é rényoné.A bon antandèr salu !

Justin