L’èr-la mi sava rodé pou vréman é mi pé dire azot,la plipar d’tan mwin lé déssu pars sak néna dann lordinatèr i rossanb pa la pèrsone é sak li la fé dann son vi.

Lé vré lordinatèr i pé ardone aou solman sak demoune la mète dodan é konte pa dsi li pou ransègn dsi sak li mèm li koné pa. In pé i di kroize lo bann zinformassion, mi ésèye fé, mé mi pé dir azot kroize arien avèk pa granshoz, é zot va oir si lo rézilta i kontante zot kiryozité.

Mé zot va dir amwin pou kossa wi vé konète la vi d’moune épi sak zot la fé ? Mon réponss lé klèr ;si in moune la tutoiye listoir son péi, si li la fé dé shoze inportan lé normal ni vé konète pars ni vé konète galman listoir noute péi. Nou la pa poul, lapin ,kanar, nou sé d’moune é demoune néna in listoir é listoir-la sé in n’afère, si ni vé konète, i fo ni koné.

L’ariv amwin dir désèrtin moune ékri zot mémoir, rakonte sak zot la fé, koman zot la viv tèl é tèl lévènman mé mi romark demoune lé pa préssé pou alé rakonte zot vi si tèlman k’in zour zot i fé lo gran so é pèrsone i koné pi azot .Mi kroi i fo ni rofléshi la dsi é dsi nout dovoir pou ransègn demoune dann noute péi.

I paré in pé i tienbo zot zoinal do vi, mé konbien, pa bonpé bien sir. Sirman pa sak la tutoiye listoir dann zot vi .Zot va dir amwin i fo réspèkt la vi dé z ‘inn é dé z’ote, mwin lé dakor, mé si konète la vi sé konète listoir mwin lé pi dakor ditou.

In vyèye pèrsone k’i disparé sé in bibliotèk k’i bril ! si sa lé bien vré néna dé bibliotèke é dé bibliotèk limanité la fine brilé é lé domaz ! zot i panss pa ? Mé sa lé vré ossi pou bande pli jenn l’avé bonpé l’aktivité avan zot i tourn la paje.

Justin