Kan lavé mayi-dori, té i manz mayi-do ri. Kan lavé pi, té i rès lanmsime, té i manz lanmsime. Kan lavé la zèl, té i manz la zèl. Kan lavé pi arien, momon té i anvoy amoin la kaz matante. Ala kossa mon papa té i rakont amoin, nana pli lontan k’lontan.
Pou mon par, moin la vi bann marmay ariv lékol la figuir blan konm dra simitièr. Zot té i di zot vant i fé mal. La diréktris té i anvoy azot dan la kizine lékol, épi in vèr lo d’sèl èk in boushé manzé, lo vant té fé pi mal. Sa té la faim té apré travay azot. Sa na lontan sa, koméla, issi sa lé rar.

Soman, déor, koman k’i éspass ? Zordi, dsi la tèr, nana plis ui san milion dmoun i soufèr la faim, épi in moun i mor avèk la faim shak foi sink sogonn i pass. Kont azot : inn, dé, troi, kat, sink. Lé kourt in ! Solman, pandan l’tan nou la konté, in plas déssi la tèr nana in moun lé mor avèk la faim. Total, i fé plis sis million dann in n’ané !
Si i kontinié konm sa : shanj plizanplis manzé an lésans l’oto, fé la guèr in pé partou, détrui la natir, mète larzan an l’èr épi demoun atèr... konbien mor d’faim i sava an avoir an plis ?

Justin