Mi pé dir azot si zot i vé fé lo tour bande tèz noute parti, zot va rande azot konte, néna pou di é rodi la dsi. Arzoute èk sa si zot i lir noute zoinal Témoignages zour apré zour é si zot la partissipe bande kongré lo PCR épi bande kanpagn noute bande dirizan, l’améné dopi l’ané 1959… Si aprésa zot la suiv in pé sak noute bande dirizan kan zot la zère déssèrtènn komine, déssèrtin groupman d’komine épi déssèrtène zinstitission, mi panss la zot i koné a popré sak noute parti téi vé fèr pou noute péi La Rényon.

Pars noute parti néna in gran prinsipe é prinsipe-la li aplike partou, dann toute son bande z’akssyon… In prinssip sinp mi pé apèl sa la lyézon la théori avèk la pratik, inn i va pa san l’ote, é l’ote i va pa son toussèl — la téori i sava avèk la pratik é la pratik avèk la téori — pars inn é l’ote lé lié dann la transformassion ékonomik, sossyal, kiltirèl é finalman sa i pé marshé konmsa avèk anpliss in bon vizyon sak ni vé fé pou noute péi.

Mé antanssion ni vé pa fé noute l’avnir dsi lo sab.

Pars konm in provèrb afrikin i di : Si wi vé konète oussa wi sava, i fo wi komanss par konète oussa wi sorte… Konète oussa wi sorte, ala in n’afèr kapital. Konète lo péi konm li lé zordi sé in n’afèr kapital, si wi vé konstrui oute péi domin.

Mé antanssyon konète lo péi zordi lé pa fassil : li lé konpliké, néna dé shoz lé pa bon, mé néna dé shoz lé bon. I fo pa fé table raz, konm i di dann la shansson l’internationale mé bien konète lo passé, ala kékshoz i pé bien ède anou dan l’avnir.

A bon antandèr salu !

Justin