Anpliss ké sa kan péi-la la vi son bann zabitan konète lésklavaz, langazism, lo kolonialism, pou vnir départman franssé épi réjyon, avèk la réklamassion son droi pou lidantité ni pé dir nout parti lé istorik pars bien ankré dann listoir nout péi La Rényon épi nout pèp lo pèp rényoné… Arzout èk sa kan lo pèp la invante in lang-lo kréol rényoné-in kiltir-la kiltir rényonèz-épi in sossyété avèk sak i apèl lo viv ansanm mé pa solman sa. Lé pa dir pou d’mazine épi konstate listorissité noutparti kominiss rényoné.

Sé pou sa, sanm pou mwin kan wi pass par lo pa d’porte parti-la, lé bien nésséssèr wi aprann son listoir épi wi angaj aou dann son mouvman dinamik pou in transformassion nout péi, nout pèp, nout sossyété solon in bann valèr k’sé sète lo pèp rényoné.

Mi di sa zordi pars mwin la gingn la shanss viv dann parti la, sinon ziss a koté, dopi son néssans ziska zordi. Privilèj l’az ? Pa solman. Admirassion pou son konba ? sirman-éspoir oir ali rokomanss zoué in rol inportan dann la transformassion nout sossyété kansréti pou kass la shène in péi épi in pèp ankor néokolonizé ziska zordi, épi privé d’in droi pou in dévlopman korèkt.

Wala inn-dé rézon mi di i fo aprann listoir nout parti kominiss rényoné. Pa solman pou konète son listoir mé pou rant dann la dinamik son mouvman pou konstruir lo fitir.

A bon antandèr salu !

Justin