Mé pou kossa lé si tèlman difissil – antouléka pou mwin – pou aprande listoir La Rényon ? Pou komanssé i aprande pa sa lékol sansa trépé, kissoi pti lékol, moiyin lékol épi gran lékol… Mé antanssion, mwin lé sirésèrtin in pé va dir : akoze mi vé konète listoir La Rényon ? Kossa k’i ansèrv konète listoir La Rényon ? Néna si tèlman pou aprande dann listoir la Franss épi l’Érop. Mé zistoman sak mi vé konète sé listoir La Rényon : kate syèk listoir in pti péi 2500 km2 sa i dovré pa z’ète si difissil ké sa. Poitan mi ariv pa !

A ! Biensir mi ariv a konète listoir ofissyèl pars sa sé in n’afère lé ékri dann zarshiv épi bande éspéssyalist la parti rouv lo zarshiv épi zot la ékri dann liv é si mi vé konète listoir-la, mi ashté in liv épi mi lire épi mi tash moiyin marke sa dann disk dir mon mémoire. Mé zistoman, la pa so listoir-la solman k’i intérèss amwin.

Sak i intérèss amwin sé listoire popilère mon péi : zistoir la trète, zistoire lésklavaz, épi sète bande zangajé, zistoire bande ti kolon La Rényon. Mi yèmré konète koman noute lang kréol la aparète épi la konstrui aèl boute apré boute. Mi yèmré konète ankore koman noute manzé lé éné, é pou kossa li lé sak li lé zordi. Mi yèmré aprande noute mantalité é koman noute mantalité la konstrui aèl. Mi yèmré konète koman noute séga, épi noute maloya lé né, même noute kadriye épi toute sorte mizik épi danss popilère.

Mézami mi yèmré aprande pou kossa é par koman nou sé nou é koman sa l’arivé. Pou kossa nou sé nou é koman sa l’arivé, avèk bande mo sinp pou konprande é sifizaman préssi épi égzakt… Listoire sé in syanss kante mèm la di.

Justin