Zot i koné bien kan in moune lé malade-sansa mèm kan li lé an bone santé,-é ké li sava oir médsin – sète la i étidyé la santé lo moune é kan li néna in maladi li fé sak i apèl in diagnostik : li rogarde kouk i marsh, kouk i marsh a popré, kouk i marsh pa ditou. Aprésa, si lo moune lé malade, li done in nom la maladi, sansa plizyèr nom pou plizyèr maladi. Aprésa solman li done in trètman pou songn la maladi si néna in trètman-si na poin éstèr-la lé mol. Romark ni koné in zour ou l’ote sé sa ké v’ariv anou mé lo pli tar possib, ni éspère…

Mi antan déza in pé apré souf dann mon trou d’zorèye épi i di : kossa l’ariv aou, kèl maladi wi kouv, ou lé biensir sa sé in n’afèr k’i gingn pa soigné… Dousman lé ga ! Pouss pa l’ bato ! mi fé solman in kozman par parabol pars mi vé pa anparl la santé demoune, mé mi vé anparl la santé mon péi, la santé La Rényon.

Kan mi antande in kamarade dirizan apré koze dsi la santé noute péi, néna in n’afèr li apèl voiyan ; déssèrtin lé o vèr, d’ote lé oranz, épi d’ote ankor lé o rouz. Sak lé o vèr lé korèk. Sak lé oranz in pé mwin korèk, é taka sak lé o rouz li lé pa bon ditou... Mé zot va dir amwin kèl kalité voiyan lé pli inportan é kèl kalité voiyan lé moinss inportan. La réponss lé pa si fassil pou doné ké sa pars sa i dépann noute griye léktir : ni koné bande voiyan ékonomik, bande voiyan sossyal, dsi l’anvironeman, dsi la kultur é in kékshoz ni doi pa néglijé sé sak i apèl lo linterakssyon rante lé z’inn é lé zot. Pou kossa mi di sa ? Pars rante lé z’inn é lé z’ote, bande zinteraksyon i mank pa.

Pou kossa mi di sa ? Pars mi koné in parti (la n’ote) i suiv noute péi dopi 1959 é li arète pa analizé, propozé, majine bande solissyon ki konvien anou. Ala pou kossa i fo ni koné zidé noute parti é pou kossa ni doi pa ète onté pou défande so bande zidé é fé avanss azot zour apré zour pou fini par mète bande zidé-la o pouvoir. Sa i doi pa mète in frin avèk noute politik d’union-an kontrère mi panss sa i doi ranfors ali.