Souvan dé foi, mi ékout bann zémission déssi la zénéalozi dann radio RFO. Pars sa lé intéréssan-sa ! Pa pou moin pèrsonèl, pars moin la zamé vréman rod kissa i lé mon bann zansète. Mon famiy la donn amoin inn-dé zinformasion, in pé vag, pétète in pé mantèr, vik nana sak i apèl sogré d’famiy, moin la kontant amoin avèk sa... I fo dir ossi, in zoli mansonz, mi trouv sa pli gayar k’in vilin vérité.
Donkalor, sak i intérès amoin dann bann zémission sé k’in bonpé dmoun i téléfone pou domann oussa zot nom i sort, dépi kan zot lariv la Rénion, kossa zot vié famiy té i fé. Finalman, lé bien k’in moun i rod son rasine, pars rasine in pié d’boi, sa mèm i amènn la vi : dann tron, dann bransh, dann fèy... par la-mèm i pass la plipar d’sak i fo pou li grandi, pou li donn flèr, pou li donn frui. Alor, akoz pou dmoun sré pa parèy ?
Pars nana in n’afèr i kont dan la vi d’moun, i kont kan i pass rolé bann zénérasion k’i vien, i transmète anou sak i apèl bann valèr, sé la tradision. In tradision, sa i sort dann tan-lontan, i ariv dann tan zordi, épi li fil dann tan demin, épi apré demin, épi pli loin ankor.
Ni pé pa dir tout lé bon pars na bon tradision épi nana galman mové tradision, pars dann tan lontan, lavé bon moun, mé lavé ossi mové moun. Mé kan ou i kalkil bien, si mon arièr-arièr famiy lété korsèr, moin lé pa oblizé vnir volèr, épi pran la prizon konm rézidans ségondèr, sansa mon prop kaz définitif. An kontrèr, mi pé désid vir le do avèk sak mon zansète la fé, san détèst azot é san détèst amoin...
Donk, mi vé, mi vé pa, la tradision sa i pé pèrmète amoin guide mon vi, sète mon bann zanfan galman, épi mon bann ti zanfan si moin nana, provik mi fé konète, provik mi fé valoir, sirtou san tak baro dovan sak lé bien. Konète son tradision, sé rant bon pié dann lékol la vi.

Justin