Oté

Konf de prèss lo préfé ? La vi lé tro kourte pou mwin anparl azot

Justin / 7 mé 2021

JPEG - 43.6 ko

Mézami, dann in néstan-zordi sé zédi- méssyé lo profé antouré par inn band lé ossi intéréssan ké li i sava pran la parol é mwin pèrsonèl mi sava tinde télé pars banna i fatig amwin zot manyèr kozé. Wi san la pa la passyon i pouss azote an avan.Zote pli gran motère sé l’annuire, l’annuire pou zot kor, lannuire pou zorèye lé zot. Défoi, mi di dann mon kère, akoz i mark pa sa dsi in boute papyé épi i di pa nou : « Pran konéssanss par zot mèm ! »

Antansyon mi di pa zot i fé ékspré, mé pou fère sa bien konmsa, ni diré sa lé dann zote natire. Si i fé in konkour somnifère natirèl rant lo préfé, lo madame Ladoussète, lo madame la réktriss épi dé-troi voyajère d’passaz, mi koné pa kissa va gagné antouléka nou sar dann linsèrtitide boutanboute konm dann tan shoval téi kour la Rodoute. Sir sé z’antrofète in zistoir mon papa téi rakonte i arvien dann mon tète :
Dann tan lékours La rodoute papa mon papa, par l’fète lo vyé Viktor, apré an avoir lèv lo koude plizyèr foi la désside fé in paryaz avèk in morissien té la, épi in l’ansien zoffisiyé pou dis fran. Sa té larzan,mé mon gran-père l’avé poin so larzan-la é li di : azot pran lo sink shoval néna lès amwin lo shoval blan, lo sizyèm-la, in sèrtin Vèrdun. Done dépar, toute i démare é Vèrdun i dékol an dèrnyé.Promyé tour Verdun dèrnyé, dé zyèm tour Verdun dèrnyé. Mon papa Féliks son kère i bate dann son do é li komanss ral-ral dsi palto son papa k’i fé pou réponss : »Ral pad si mwin konmsa ! »
Troizyème tour Verdun i doub inn, i doube dë, i doube lo total é kapital épi sé l’arivé Viktor ,Féliks, zonm son domi-frèr épi d’ote ankore i antame in danssrone. Apré parlon pé ki soi bien, Viktor i di band paryère : donn mon n’afèr ! Lézot i done lo dis fran pou pikol in kou ziska lo soir. Mi arète la zourné tèrla néna ankor dé shoz la spassé. Antouléka, la pa mwin zordi i sava ékoute lo préfé é son koteri, mi profère rovoir dsi mon disk dir zistoire mon papa la rakonte dann tanli lété ankor la anparmi l’moune.

Inkyète pa talère dann télé lo band jakassèr va ropran kozman banna é konm mi koné azot mwin lé sir la pa zot va kass lokate patte in kanar. Ni artrouv pli d’van, si bondyé na pityé. Mwin téi vérakonte azot kossa léta lokal la di zordi, mé boudikonte la vi lé tro kourte pou pèrde mon tan konmsa.