In péi i apèl la Grèce lé dann malizé. L’Éspagn, Portigal, l’Irland épi d’ot ankor lé dann gro traka. Poitan bann péi-la lé dan l’Erop : zot lé mèm kosté sanm bann gran péi l’Erop, é l’Erop la pa trouv in moiyin pou mèt azot in pé dann shomin galizé. Sanm pou moin, lo libéralism èk lo kapitalism i yin pa bou trouv bon solisyon pou bann péi lé moin dévlopé. Alor, mazine in pé lo ka bann péi l’Outre-mèr, an parmi l’Outre-mèr fransé. Zot l’ansien péi kolonyal la pa nyabou trouv in bon solisyon pou zot. L’Erop osi la pa trouv sak i fo fé dan bann péi l’Outre-mèr pou trap lo dévlopman ;

Si ni anparl in pé La Rényon, ni apersoi na poin la-ba dan la Frans in bon doktrine dévlopman pou nou. Poitan, nou la konèt osi in bonpé gouvèrnman la droit konm la gosh, é lé z’inn konm lé zot la pa nyabou trouv in bon tik-tak pou nout dévlopman. Kisoi kan l’ékonomi té dann bo tan, kisoi kan l’ékonomi, konm zordi, lé dan la kriz. Donk, moin lé blijé dir i fo pa kont dési bann gouvèrnman la Frans épi dsi l’Erop pou mèt anlèr in bon doktrine dévlopman pou nou, pars lo zoutiy zot i donn anou lé pa sak i konvien anou.

L’èr-la, mi pans i fo ni trouv, par nou mèm, in bon doktrine pou trap nout dévlopman. Sé nout matyèr griz ki pé pèrmèt anou trouv sa. Nout parti la fine bien konprann in n’afèr konmsa. Sé pou rézon, shak foi na in z’éléksyon inportan, li propoz son plan. Dimansh dèrnyé ankor, li la donn in l’idé sak li vé pou La Rényon. Mi pans, bann kandida na intéré bien lir sak ni propoz, pars nou osi, nou na in bout la vérité. Nout par la vérité.

 Justin