Konbien d’tan i pèrde, konbien l’énèrji i pèrde, kan plizyèr z’organism piblik avèk shakinn son konpétanss, i marsh dsi zot pyé inn-a l’ote, san konète koman i fo fé pou roganiz in lakssyon piblik komine. Késtyon d’mutualiz lo bande moiyin, késtyon d’rande pli dinamik lo travaye kan lé z’inn é lé zot i mète dakor dann la réalizassyon d’inn osinonsa plizyèr gran projé.

Biensir néna in loi k’i romonte l’ané 2014 é loi-la, lé sanssé pèrmète la roganizassion lakssyon pi blik rante toute bande tik-tak néna shakinn son par dann lakssyon piblik. 2014 ? Mwin la di, mé akoz l’atande ziska déssanm 2022 pou fé in rényon sak De gaulle noré sirman apèl in nouvo mashin –antanssyon mi anparl avèk réspé,pars si la pran lo tan sé pars sirman lété pa fassil mète inn avèk l’ot, avèk l’ot, avèk l’ot pou gingn travaye ansanm.

Poitan lidé an èl-mèm lé sinp é oila koman la prézidante konsèye réjyonal i oi sa :

"Lidé sé d’mète dakor pou déssèrtin gran projé épi in sèrtin nonb priorité".

Astèr Maurice Gironcel i réponde pou son par sak i fo sé in gran plan pou lo dévlopman durab par raporte nout gran défissit dévlopman é lirzanss ké nou néna d’ratrape nout rotar.

Pou linstan mwin néna konm linpréssion i parl pa ankor d’sinplifyé, mé lo sénat é mèm lo gouvèrnman mwin néna konm linpréssyon sré pou in gran réform lorganoizassion bande péi l’outre-mèr.sinplifikassion pou pliss l’éfikassité.

Alor konm i di : a suiv é alon bien rogarde si bande lign i komanss pa boujé.

A bon ékoutèr, salu.