Kan in n’afèr d’loi lé kont in kamarad, mi dmann amoin kèl plan la mate kont li. Nou lé forsé réazi konmsa, tèlman la zistis lé kont nou dopi si tèlman lontan. Alor, kan mi antann in pé i di : « mi fé konfians la zistiss mon péï ! », sa in n’afèr mi konpran pa bien.
Pou kossa ? Pétèt akoz la zistis fransèz “i lav pa pli blan” konm èl i prétan... Pou mon par, mi oi in zistiss i pran parti, la pa indépandan konm k’i fodré !

Touléka, la pa sak i sort ariv Sin-Pièr va fé shanj mon lopignon !... Ala in prokirèr i di la pa bézoin rant an kondanasion ! Ala in kour dé kont i di na poin pou roproshé ! Ala in bann dossyé d’apré sak mi antan dir lé kaziman vide.
Poitan, tribinal i kondane kant mèm bann kamarad té i fé parti komité d’fète Sin-Pièr dann tan Elie Hoareau té lo mèr. I kondane azot akoz i fo bril azot dsi pti fé, fé soufèr azot ankor, fé an sort zot famy i rèss ankor in pé dann traka.
Alor, fé konfians la zistis mon péï ? Konm di lo patoi, alé di sa avèk mon shoval, pétèt va kroir azot ! La konfians i akord pa konmsa !

NB. Parlfète, solon in sondaz, i di nana 72% dmoun i fé pa konfians la zistis. Zot i trouv sa drol, zot !

Justin