Matante Zélida la ékrir Justin :
Mon shèr nové, mon spès salté,
Si mi konpran byin, koméla é dépi kèk zour, sé la Rézyon la fine nir lo patron déssi la késtionn rout La Rényon. Astèr, mi pans zot v’arète dir sé lé zot lotèr. Si par-la nana in katastrof routyèr, mi éspèr zot i kontant pa zot lav la min, dir sé pa moin sé l’ot, sansa fé konm gran zoizo la-ba dann Lafrik di Sid, bour son tète dann trou galé épi fé konmsi zot la pa vi aryin. Toulfason, sé konm in konfitir doné pou in koshon ! In koshon rouz de fon byinsir !

Justin la fé aèl pou répons :
Mon vyé matante, konm la limyèr i klèr amoin, mi pé asir aou : mon kèr lé rouz é i shanj ar pa...
Pou la késtionn rout, lé vré, la Rézyon na plis pouvoir zordi ké sak li lavé yèr. Lé vré, é la pa in n’afèr i doi fé pèr bann Rényoné, vik sak ni vé, sé an avoir rèsponsabilité dann séktèr-la konm dann d’ot.
Oir lé shoz an Rényoné, rogard nout z’intéré pou lavnir an Rényoné, protèz nout lanvironeman an Rényoné galman, fé nout dévlopman dirab, réspèk nout kiltir. Myé k’sa : sak moin lé sir, sék plizanpli dmoun sar konm moin, vik pou nou, sa sé in n’afèr vital : fé konfians nout parti pou lavnir !

Justin