Na in nafèr mi esay konprann ; anfin tout fason mi viv a li, avék li ; mi vé koz si la konfidans ; i di a ou lé konfidansièl ; na bon pé sitiasyon ; na dzafèr i pé pa dir vréman a ninport ki ou dan ninport kèl kondisyon.
Bon dakor ; tout fason na pétèt minm dé ka ou sak lé an fas de ou sré inkapab sézir lo mésaz donk vomié pa dir ; li kab transport sa é déformé.
Lo sèl problèm, sé ka fors gard zinformasyon konfidansièl, nou fini par kaptiv la konésans, i pé apèl sa blokaz zinformasyon ; sak i koné i gard sa po li ; lé zot rès dan liniorans, tanpi po zot…

Oui mé, tanpi ou domaz !
Si ti partaz pa ton konésans, koman ti vé la sosiété i avans ?…
Nou va rès ék in élit ki koné tout, tout sak i apèl la lozik istorik, avék lé koz é lé zéfé (konsékans).
E in gro paké domoun touzour an rotar dinformasyon !
Pran légzanp si in papa (wouof, i pé èt la miin) ; li di a toué : « fé pa si, fé pa sa » mé li donn pa zéksplikasyon ! Pokoué ? Mi trouv domaz po la konstriksyon « konitiv », la fabrikasyon lintélizans son marmay ?

Na bon pé zéléktèr la pa konpri po koué tèl ou tèl parti la di vot po tèl ou tèl kandida ; somanké nad rézonman, zéléman d baz konpréansion la pa été doné ; sinon, lo militan té absan in rénion, li la pèrd in mayon. Baz si lo responsab (li, li la été dan la konfidans).
Fo aksèp ki pé avoir plizir nivo dinformasyon ; sinon ni viv pi !
Dé foi, din komine, in résponsab i pé an dous san sekous domann lapui po in vot minm son lopozisyon.
Minm lasanblé nasyional oui kroi dawar pa zaranzman ant group ? (traktasyon)…
Donk zordu, fo konèt filtré linformasyon… la transparans na war aprè ?

Justin