I souvien, dann tan sharète bèf, demoun téi mètein bèf dann brankar : lété lo bèf prinsipal, lo pli kalifyé, la konfyans lo propriyétèr. Dé-foi, té i mète in atashé dsi l’aryèr, kisoi in jenn bèf an formasyon, kisoi in bèf lété bon arienk pou donn kou d’min. Sa lété lo bèf l’aryèr mé té pa li k’téi fé lo pli gro travay pars li té pankor paré pou sa, osinonsa li la fine pass lo paré.

Astèr dan la vi, rant bann moun nana os iso dé kalité : nana sak i amenn l’afèr an mètr, nana sak i suiv : in manèv la pa in z’ouvriyé kalifyé, la pa toulmoun i pé amenn la troup konm k’i fo, dann fotbal nana onz zouar, épi in sèl kapitène.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan, dakor rantre nou.