Antour in moun tousèl, pou donn ali son rès trankil, la pa bon. Sof si lo boug sé in lion déshéné, sansa li sé in métèr d’fé profésionèl. Astèr-la, i fo karsèr ali.

Antouré pou anpèsh fé in nafèr lé bon pou lo péi, la pa bon non pli. Sirtou si ou rakont la mantri pou fé prann demoun po d’shanm pou pla kouvèr. Sèt-la sé in lantouraj pintad !

Antouré pou fé in bon projé pou lo péi épi pou lo pèp, sa in bon n’afèr. I fo mèt ansanm. I tonm bien : sèt ané nana 10% dmoun an plïs, la fé mark zot nom pou voté épi 2007 èk 2008 nana zéléksion an paké. Dizon la pa si tèlman zéléksion pou zéléksion, mé nana in ta zafèr inportan pou désid fé, konm la rout an kornish, lo tram-trin, lo park natïrel, l’énèji prop, protèz la natïr, tousala.
I fo nou mèt la min ansanm. I fo nï antour. Solman ni obli pa : nana antouré avèk antouré, na lantouraj lé bon, épi nana lantouraz lé pa bon.

Justin