Boudikont mi yinm byin nout manièr kozé, néna pou bwar, pou manzé dan nout manièr manié lo mo, a koz ? In minm mo i pé an awar diféran sans, solon kélké swa son tilizasyon. Par ékzanp, kan ni tiliz lo mo “réshofman“ konm i di, néna in tilizasyon pou di sak lé bon é in tilizasyon pou di sak lé mové. Si ni di in moun la fré fo absoliman réshof a li, kiswa mèt in bon linz sho, in bon kouvértir. In momon poul i réshof son p’ti volay, kiswa dan la plim kiswa dann divé. Sa lé bon.

Konm kan néna in réshofman rant dé moun. Dé moun té i koz pi dopi lontan la désid rovni byin, la i tonm byin osi. La zordi ni antan i di é ni wa néna konm in réshofman rant la Frans èk Kiba. Dopi lo tan nou la rèt fashé èk Kiba, boudikont nou la pran lèr èk in vié révèy té i marsh pi, nou la ékout ladi lafé san konprann é zordi rozman ni rovyin èk in méyèr santiman. La osi lo réshofman lé bon vik néna touzour in mwayin d’mwayéné.

Lo réshofman pa bon kan i sazi lo réshofman klimatik, la lé pa bon ditou é lo pli grav sék mandoné i pé pi rovni par déryèr. In fwa nou la égzazéré, fouty sé nou, lo fré i dovyin pli fré, lo sho i dovyin pli sho. Parl pi si la tépératir la mont ziska dé dégré an plis ké prévi, la nèz i fonn tankipé, lo nivo la mèr i mont, désertin zandrwa dolo va manké, é désértin zandrwa dolo va débordé. Alorss sanm pou mwin fo pa konfonn réshofman èk réshofman !