Mi sorte garde dann diksyonèr Alain Armand kossa mi di kan mi di in moune lé an « shalèr » ? Mi di soi li lé an kolèr, soi li lé « fou » - sa mwin téi koné pa-soi li néna son bann shalèr. Donk pou dir in moune lé an kolèr, mwin la di ali li lé « an shalèr » é bien sir li la pa konprann mon kozman dann sanss mwin téi vé li konprann é sa la antrène problèm dsi problèm é toute mon démanti la pa ansèrv arien.

Mwin téi vé rouspété – i di galman bandé !!!- mé mwin l’arète la pars sirésèrtin sa téi sava dézénéré é toute fasson mon vante té plin avèk la diskission é mwin téi i oi pa mwin arkomanss in nouvo shapite diskission zour-la. Mé lé vré néna défoi, kan wi di in n’afèr in moune i fo fèr atanssion - tourn sète foi son lang dann son boush-, mé antanssion ziska kan, ziska oussa, sof si wi désside koz la lang dé sign é ankor…

In n’ote foi, mi trouv in moune mi koné é mi domann ali si li l’apré bate in karé.Oté Baya, lo kozman li la larg amwin té pa ordinèr.Li la di : « Bate karé, bate karé, wi pran amwin pou in fam de vi ? ». Mwin la fèrm mon také é mwin la di , an rantran mi sava domann sa diksyonèr Alain Armand é wala kossa mwin la lir : « fèr inn promnade ! » .Na pwin arien lé inossan konmsa donk la pa bézwin koz avèk mwin konmsa...Mwin té kontan mon kozman inossan sé l’èr mwin la trouv in dalon.Mwin la rakonte ali mon mézavantir é pou ashèv amwin li la di : « Wi panss ou la di in bon n’afèr lou la ? »

Mwin la parti rode fèr in tizane matrékèr pars miwin té o-boute lo boute lo boute.

A bon antandèr salu !