Mézami mwin la fine antann dir in bonpé kozman dsi la konfyanss. Néna inn i di konmsa : konfyanss lé mor dsou pyé tamarin. In n’ote i di : konfyanss lé mor kouto dann do. Inn ankor, konm mwin la marke an-o la : konfyanss la tyé son mètr. Toute bande kozman-la sé pou di alé pa akorde oute konfyanss ninporte kissa. Toute i sava dann même sanss, i fo méfyé l’moune, méfyé la sossyété. Fé konfyanss sé lo méyère fasson k’i roule aou dann la farine.

Mi panss, zot konm mwin, lé kapab rapèl plizyèr ka demoune té roulé afors an avoir konfyanss.

Mé si ni kalkil bien dsu san foi wi fé konfyanss pé s’fèr inn-dé foi ou lé roulé pars la plipar d’tan bande rapor sosyal lé bazé dsi la konfyanss, lo pli sir valèr noute lédikassion la done anou. Mi rapèl dan l’tan, demoune téi donn parol é parol doné téi doi réspékté… zot sar dakor avèk mwin ké noute pratik i sava an sanss kontrère toute sak mwin la marke an-o la é pou mwin mi profère in vi bazé dsi la konfyanss k’inn vi bazé dsi la méfyanss.

Alé ! Mi kite azot rofléshi la dsi é ni artrouv pli d’van. Sipétadyé.

Justin