Mézami dann radyo épi dann d’ote média nouvo néna in ta d’parolère-parabolèr. Zot i di lo vré, lo fo, lo falk épi toute sorte zafèr : kissoi la vérité, kissoi bann balivèrn. Mé dann toussala, koman i pé démaye lo vré, avèk lo fo, lo bon grain avèk l’ivré ?

Fé konfyans alor ? Mé kissa i fo fé konfyanss, kissa i péfé ? Sak i di A, sansa sak i di B, sansa ankor sak i di ni A ni B ? I fo di koméla lé shoze lé in pé konpliké konm nout toute i koné. Mé par l’fète avan sa lété pa sinpe nonpli. Fé konfyanss l’éta ? Koman i pé fère in n’afèr konmsa sirtou kan ou la fine konprande li vé arienk plush aou dann bonpé zafèr. Sirtou kan wi oi koman li navig a la vu-zordi sé blan, doin sé noir, apré domin la fine shanj ankor… Si tèlman ké ou lé a’dmandé avèk kèl soss li sava manze aou.

Alor in pé la mazine fé zot loi d’la vi par zot mèm. Zot la di : mi manz pa arien si mi koné pa kossa néna dodan. Mi pran pa okin médikaman si mi koné pa son konpozission, si li va fé d’bien, si li fé d’tor. Mi panss sa sé in bon loi… Sof ké kissa i pé prétande konète toute zafèr dann in monde i invante dé shoz sana é in zour kan la fine fé bonpé déga i fini par rokonète lo bon té pa si bon ké sa, émèm kaziman mové.

Égzanpe : lo klordékone. Sa té bon pou tyé bande mové zinsèkt dann karo banane la mète dann karo banane shé noute bande frère antiyé. Égzanp : lo konsékanss bande zéspèryanss atomik shé noute bande frèr Tahiti. Ni pé anparl ankor lo médyator, san konté toute sorte kalité la manjaye in pé trafiké i vande in pé partou.

Souvan demoune i di : in mal pou in bien, mé souvan défoi i fodré di : in bien pou in mal, in bien pou toutsuite é in mal dan l’avnir. Alor, mézami, mi arète la, dabor pars la pa di amwin ranpli in zoinal mé fé in modékri, épi pars afors fèr sin pe mwin la père fé ankor in pé pli konpliké é mi arbite dsi la nossion d’konfyanss – mor dsou pyé tamarin konm zot toute i koné.