Mi pans zot i koné kosa i lé la pasyon lo Christ konm mi pans zot i koné kisa lété Barabas. La plipar d’moun i koné sa, pars kansréti pa bonpé mé la plipar rant nou la parti dsi l’ban katéshis in koup de tan. La pasyon sé kan la klout Zézikri dsi la kroi é Barabas lété son voizin : son voizinn kroi si zot i vé. Pars dann tan-la kan lété ki kloute demoun dsi la roi, é k’té i tonm in zour d’fète, té i domann lo moun té foulé zalantour kisa zot i vé k’i larg. Zour-la, lo moun la domann i larg Barabas, in spès konplotèr épi i tyé Zézikri. Sé sak l’a fé ! Donk Barabas, mi koné pa si li lété vréman koni dann la pasyon mé sak lé sir sé k’la si tèlman fé d’vantredi sin ké demoun i koné kisa lété lo Barabas. Donk si i di d’ou, in kozman konm anlèr la, sa i vé dir ou lé bien koni mèm si ou lé pa koni an bien. Alé ! Mi lèss azot rofléshi la dsi é ni artrouv pli d’van sipétadyé.