Pardon éskiz ! Moin té i kroi, avèk manir shanjé, so léspès fougade la pran gouvèrnman : tir sak lé plito bon, armète anplas sak lé plito mové. Donkalor, moin té i atann in révolision dann lékol : par égzanp, diminié lané d’moitié, diminié lo moi par dé, fé dë zour dan inn ! Non, sérié : moin té i pans solman, té i sar donn in lordinatèr 100 euro tout marmay lékol. Konm i fé dann inn-dé péi l’Afrik. 100 euro, sa la pa tro shèr, épi i évite in pé, fé konm torti, port out kaz déssi out do, épi sirtou, siouplé, aprann travay konm in marmay modèrn. Arète in pé so tan Vercingectorix. Oussa-sa ? Marmay lé kol la gingn sonl list konmsi lo tan téi débouz pa.
Kayé : tann kayé, pti karo, gran karo, moiyin karo, gran forma, pti forma, moiyin... Kréyon : tann kréyon, niméro tan. Klassèr : tann klassèr ! Kréyon koulèr ( i fé pa arien èk sa ?), éstilo vèr-rouz-blé-noir. Konpa k’i fé lo ron an masikrok l’ékèr (sa lé an plastik, dann sak i pète an dé ! Sa i fé pèf !). Zanfan nana in list konmsa ! Papa momon lavé in list konmsa ! Granpèr, granmèr lavé galman in list parèy ! Bann arièr-arièr téi ékri avèk in zépine déssi in fèy fig...
Méssié lo minist asé avèk vié-vié métode konmsa, vié-vié z’afèr konmsa. Akoz i arpran pa bèk plime épi l’ankiyé l’ankr, sak i bèrn aou, i bèrn out kamarad, i sali la tab,la min, linz, parl pi !
Non zot la pa pou lo shanjman : zot lé vié ! Zot lé dépassé ! Zot i tonm an poussièr ! Dizon zot lé konm bann momi l’Egypte : in bann Ramsès ! In bann toutankamon !

Justin