Ala l’afèr ! Afors ravaz guèp dann son ni, i ariv in zour li pik a ou : mi vé parl péi komor. Sak l’apré spassé lé grav, é ni koné pa kossa i pé arivé la-ba, pétète issi ossi.

Dan so zistoir kolonèl Bakar, ni koné pa lo rol la Frans la zoué. Sak bann sèrvis fransé i di i tienbo pa d’bout. Ala k’i di soi-dizan lo boug la rant dann in kwasa-kwasa épi li la parti Mayotte, la kaz son frèr. I di pa plis ké sa : i amontr pa lo bato, i di pa kèl koté li la kosté, pou kossa bann larmé fransèz la pa débisk ali avan li ariv, kissa téi donn ali bann zarm dann tan li lété Anjouan. Poitan, gouvèrnman la Frans i koné tousa-la. Akoz i di pa ?

Éstèr, i antan dir la loi i anpèsh ranvoy lo boug dann son péi. Gouvèrnman péi Komore lé bandé an trant-sis, i di konmsa li va rofiz débarkman bann komorien la parti Mayotte, akoz in péi étranz i pé pa ékspils in moun i sava dann son prop péi, vik péi Komor sé in sèl péi avèk kat bann z’il : Anjouan, Grande Comore, Mayotte épi Mohéli. Kossa i sava arivé ? Kissa i sa gingn z’annuiman ? Ala la Frans mayé konm bébète koko dann la kol Jak.

Justin