Matante Zélida la ékrir Justin :
Mon shèr nové, mon spès salté, rouj-de-fon dovan l’éternité,
M’a dir aou in n’afèr, lé vré, mon parti la droite la gingn in bon kou d’zok dèrnyé z’éléksyon dépité, mé nana kant mèm dé z’afèr la fé plézir amoin. Inn, Parti kominis la gingn lo kou (par l’fète, mi éspèr pou ou, ou la boir tizane matrékèr). Dé, bann fanm la déside fé valoir azot in pé : dsi sète, nana troi fanm dépité. Mi sipoz bann rouj-de-fon i doi pa z’ète kontan èk sa, mé moin, mi kontant amoin... an éspéran, proshin kou nora plizyèr fanm dépité la droite. La koz bann fanm i avans, mon névé, ké ou i vé, ké ou i vé pa ; tok ! Pran sa pou toi !

Justin la fé pou répons :
Mon vyé matant k’i koz la boush rouvèr,
Si ou té i égzis pa, noré fali invant aou. Mi romark ou la fé, konm in pé i di, in gran bon an avan. Poukoué mi di sa ? Pars na poin si tèlman lontan, la pa ou mèm té i di, bann fanm lé fé pou okip z’anfan, fé son ménaz épi okip son mari ? Lo tan la pasé i fo kroir, vi ké zordi ou i koz konmsa. Mé, di amoin in n’afèr, si mi di aou, an parmi bann dépité-madam, na inn la di li la bate dé mèr, é anpliské sa, dé mèr blan. Kosa ou nora pans de sa ? Pars, ni vé ni vé pa, La Rényon, nou lé mélanjé, é sanm pou moin, i oi pi la valèr in moun suivan sak i apèl son koulèr ; sé sak mi kroi kant-a-moin. Donk, dir ou la bate dé mèr, sa i pé dir. Dé bononm mèr i pé dir osi, pars isi nana, konm déor, ankor in konba pou l’égalité. Mé dé blan ? Zordi an 2012 ? Dir sa, sé dir inn kouyonis. Konm koi, pèrsone na poin lo monopol pou sa, é son roiyome lé sipèr-gran. Tok ! Pran sa pou ou !

Justin