Mi koné pa si zot la fine romark in n’afèr mé mi pans ké oui pars sa lé bien romarkab. Néna désèrtin moun, kan zot l’apré kozé zot i ansèrv lo lésprésyon moin la mark an-o la. Pou kosa zot i di sa ? Mi pans sé pou donn z’ot kozman in pli gran porté ké si té zot mèm, tousèl, l’apré di. In pé i di osi : « Konm di papa ! », mé mi profèr lèss papa trankil sirtou si li la fine pass dann l’ot koté la vi-papa n’arté pa di sa, sanm pou moin. Souvan défoi désèrtin i gliss kozman-la dann in ladi lafé, zot l’apré rakont dsi d’moun. Donk zot i done plis lo poi in kozman lé pa prouvé ditou ké lé vré. A ! La di , la fé ! Moin pèrsonèl mi yèm pa zot é mi yèm ankor moins kan i anparl de sa konm in éspor nasyonal rényoné. In drol d’éspor i fé mal oir lo moun, i distil la mansonzri é i kalkil mèm pa lo konsékans sa i pé an avoir. An touléka, si zot i ansèrv kozman-la, zot i pé kontinyé mé i fo zot i rofléshi pou majine lo konsékans sa i pé avoir. Alé ! Mi kite azot la dsi é ni rotrouv pli d’van. Sipétadyé !