Oté

Konm di Kolibri : « Mi fé sak mi gingn ! »

Justin / 24 out 2018

JPEG - 43.6 ko

Matant Zélida la ékrir Justin
Mon shèr nové, mon spès salté, rouj-de-fon dopi l’étèrnité, si mi di aou, mon nové, tout z’ot kozman dsi lo réshofman klimatik i ansèrv pa arien. Dabor La Rényon lé si tèlman pti-touzis si i dovine ali dsi kla kart !- ké mèm si nou lé réspéktyé a désan pour san par rapor l’anvironeman sa i ansèrvré pa rien ditou. Dézyèm z’afèr sanm pou moin si néna in réshofman lo klima sé la déstiné k’i vé sa épi pa d’ot shoz. L’aktivité imène mi pans pa sa lé pou gran shoz ladan. An touléka sé sak in bonpé d’moun bien plasé - savan, politsien épi z’inzényèr tout kalité - i pans épi i di tou lé zour sak zour. Alor, koz si zot i vé, ékri sak zot i vé, moin pèrsonèl sa i fé pou moin konm lo dsi fèye sonz. Tok ! Pran sa pou toi !

Justin la fé pou répons :
Mon vyé matant k’i koz solman la boush rouvèr, i étone pa moin d’où sak ou l’apré di. La pa arienk ordi mi antann in n’afèr konmsa é konm moin la fine di : la pa sa va fé shanj amoin d’avi.
Dabor pars si lé vré La Rényon lé pti nou lé pa tou sèl dann la lite pou défann l’anvironeman. Obli pa dé zané é dé zané, Paul Vergès lété prézidan l’onerc é sak moin lé si sé ké la majorité bann politik an Frans lété bien dakor avèk son zidé. Pars son zidé, konm sak ni défann zordi sé sinploman la voi d’la rézon kont la voi d’foli.
Dézyèmman, si lé vré in bonpé savan la défann bann zidé fos dsi lo dérègloman klimatik, sé pars zot lété ashté par bann kapitalis pou fé zétid é pou fé rapor i prézant la mansonjri konm la vérité. Zordi sé in n’afèr toulmoun i koné é la pa in dékouvèrt ni in l’invansyonn ma par.
Pou finir m’a rapèl aou zistoir d’lo kolibri. Kolbri sirman sé près lo pli pti zoizo néna dsi la tèr. In zour dann l’androi li lé in l’insandi baba i pète i fo oir. Tout zanimo i kour kashyète, i travèrs mèm bann gran flèv pou pa k’i brul azot. Kolibri, pou son par, i pran in pti fèye dann son bèk épi i fé in kantité karé é shak foi li mète in pti pé d’lo dsi lo fé. Bann zanimo i domann ali kosa li fé, si sak li fé i ansèrv kékshoz, li réponn : « Mi fé sak mi gingn ! »
Tok ! Pran sa pou ou !
NB. Mé, moin pèrsonèl, moi n la natann in n’ot fin pou zistoir-la. La fin, sésa ! Kan tout bann gro zanimo la vi sak kolibri té apré fèr, zot osi avèk z’ot moiyin la mète a anvoye delo, bate do fé avè bransh, kapote la tèr si tèlman lo fé la fini apré féblir épi par tinn. Donk kolibri la fé sak li gingn mé li la angant lé z’ot zanimo fé konm li an plis é an myé.