Konbien foi mi antann i di nou lé pa déssi la tèr pou toultan, nou lé d’passaz. É lé vré, ni sava pa rèst la pou lo grin, konm in zèrb rar i fo pa pèrd. Nana si tèlman kréatir konm nou, alor lé normal, kan l’ariv nout tan, ni sava koté d’tanto épi ni lèss koté d’issi pou sak i sort arivé, épi pou sak i sava arivé. Oté, lé ga ! Mi di pa sa pou rann azot trist, mi di sa sinploman akoz lé konmsa.

In foi, moin la fine di sa, mi domann amoin, par moin-mèm... dann mon kèr... akoz na in pé i fé konm si zot lété propriétèr la tèr, an plis in mové propriétèr k’i gaspiy tout zafèr, k’i fatig la natir, k’i ashté in bèl bébète loto pou alé rod dopin koté z’ot kaz, sansa pou amène marmay in lékol mèm si lé pa loin, mié ankor, pou alé pèrd z’ot pti pé la pasians déssi la rout, konm tout z’ot dalon, épi avans pli dousman k’si zot lété a pié.

Mi larg 150 gram gaz karbonik par kilomète, 1 kilo 500 pou 100 kilomète. Nana 100 mil moun i fé parèy ké moin épi i larg 150 tone la poizon dan l’èr arienk dann in zourné, épi ni trouv drol lo tan la shanjé, l’èr lé moin gadianm.

Akoz ? Akoz ni fé konm si la tèr s’ta nou an plène propriété. Alé oir nou na arienk l’uzufrui la-dsu. Konm di kréol, nou na arienk la jouissans.

 Justin