In soir, plito in gran matin pars avèk tout bann shène télé, ou i koné pi kélèr i lé, si ou lé yèr, sansa si ou lé zordi. Arzout èk sa bann zémisyon intérésan i pas touzour in l’èr inposib. Lo pli souvan i pas granmatin pou La Rényon. Sa la pa grav, bien antandi mé agard in télé katrèr d’matin lé kant mèm in pé bizar.

Donk in soir, plito in gran matin, moin la rogard in l’émisyon dsi l’aktyalité. L’avé in bonpé z’afèr intérésan dodan, mé l’avé sirtou in lékol éspésyal laba dan la Chine, in lékol pou form bann bann fam shèf lantropriz. Ladan nana bann madam i sort loin : inn dan la bann la pran vin-katrèr d’tan lo trin pou li vnir dann lékol la. D’apré sak moin la vi, sé in bon lékol é nana bon-bon rézilta : i aprann la zéstyon, i aprann bien koz shinoi, i aprann lo métyé shèf l’antropriz... momandoné lo formatris i amèn in madam pou vizit in l’antropriz in moun la pass par lékol la avan èl. Té in lélvaz koshon déza konsékan vik i vann dé mil koshon paré pou la sarkitri dan in an. La madam apré vizité i poz in ta késtyon pou èl mèm pran konfyans dann lo boulo èl l’apré aprann.

Par égzanp èl i domann si la pèrsone la gingn larzan pou anprété fasilman, si èl la bénéfisyé bann bon konsèy avèk vétérinèr, si èl lété bien édé dann son travay par lo moun bien plasé, si bann bononm la pa konplik son travay. Momandoné, èl i poz in késtyon ; èl i di konmsa, vi k’lo sistèm féodal lé ankor in pé bien vivan dann la kanpagn, si èl la sirmont fasilman bann difikilté. Lo madam i fé pou répons : dir aou moin la pa gingn difikilté sré rakont mantèr, pars dann mon prop famiy mon bèl mèr té i konpran pa sé pa son mari i komann dann l’antropriz-la. La madam an éstaz i di, èl osi èl nora difikilté mé èl i pans èl va gingn sirmonté.

Mon bann dalon si mi rakont azot zistoir la, sé pou dir azot bann madam i pé an avoir zot shans dann la sosyété é dann lékonomi, mé sé pou dir galman lo pasé lé pa définitivman mor é lo tan ansien li lé touzour la l’androi ou i atann pa li... Mao Zédong la pran pouvoir l’ané 1949 ; zordi nou sé l’ané 2013 donk la révolisyon i dir dopi soisann dé zan é malgré so tan la, nana touzour l’aryaj ; Konm di lo kont : la vitès na son tan, é i ansèrv de riyin pa tienbo kont de sa.

Justin