Sak konm moin la parti lékol lontan, i pé dir azot, l’édikasyon nasyonal dann tan la, son léspri lété bien konpliké.
Lortograf fransé, zot i koné lé pliské konpliké, mé lo kalkil i done pa son par lo shien... In légzanp na in robiné i koul dann in sitèrn é li donn in sèrtin kantité d’lo par èr d’tan… Lo sitèrn nana in sèrtin volime mé li nana konm in fuit tazantan, é sa i fé pèrd dolo. Arzout la dsi, i koup dolo in-dé z’èr d’tan par zour. Donk késtyon ? Si i komans ranpli sizèr di soir, kansa li sar plin pou vréman. Sé dir azot si dann tan-la marmay lékol, konm amontrèr lékol l’avé bézoin l’aspirine, dé foi mèm kalmine. Romark... in pti trépé té i trouv sa vit, mé in bon pé téi pèrd l’èr.

Romark azot bien la pa arienk lédikasyon nasional léspri lé konpliké. Minis l’intèryèr , pou son par, li lé konpliké galman. In légzanp ? Zéléksion éropéène dann l’outre-mèr. Dabor inn, solèy i koush pa zamé dsi l’outro-mèr : kan in koté i fé noir, l’ot koté solèy i pète. Alors, pou kosa la fé in sèl sirkonskripsion avèk tousala ? Té pa posib kass an troi ? Zot i koné lé tro konpliké pou fèr sinp… Estèr donn lo rézila tout bann kandida épi triy dann ta sak lé élu. Mi pans pa lé si fasil ké sa. Sé pou sa la donn sa an dèrnyé alé oir la komans lo votaz an promyé… Fèr sinp lé tro konpliké !

Aprésa i anons partou bann marmay lékol kour élémantèr lé pa tro for an kalkil, lé pa tro for dann l’ortograf, lé pa tro fo dann riyin si zot i vé. I di pa nou, sé plito bann programèr, léspri lé tro konpliké, épi i diré i fé mal zot tété kan i vé sinplifyé in pé. Konm di la paroli, lé tro konpliké pou fèr sinp !

Justin

NB Na in pé d’tan in kmisyon d’moun kalifyé la désid sinplifyé l’ortograf. Touzis si batay i pète pa ! Mèm sak lété pou sa, la dévir palto dann milyé shomin é lo sinplifikasyon la rès an pane. Astèr alé kass out tèt dsi in n’afèr lé pa tro la pinn pou kasé... Demoun i mète dizan pou manyé inpé l’ortograf é la pa bézoin sink pou obli total é kapital.