Ala Dominik Strauskann la fine vnir gran diréktèr dann FMI : kan ou sé in péi in pé mizèr, ou la domann lo FMI pou tir aou dann la, dizon ou la pou fé sèr in pé pliss out kolé. Akoz aprésa, ali ki komann out politik, pi-z’apré out pèp i krèv ankor plis la faim.
Kan ou di lo Fmi, la bank mondial épi l’omc, ou lé dann kèr lo kapitalism mondial : ou tourn lo do tout sak i apèl lo komèrs ékitab, lo dévlopman dirab, sèrvis piblik. Ou tourn lo do lo sosial. Ou anbèk an plin dann in sistèm lé pa bon pou la mazorité dmoun dsi la tèr... Alors, Dominik Strauskann, i di pa sa in fran sosialis ? I di pa tro zour li-mèm téi vé konbate lo pti z’onm ? I di, mé dir avèk fèr la pa lo mèm zafèr. Kan koshon lé dvan son l’oj, sort aou dvan.
Akoz mi di sa don ? Akoz, mi sort oir lo gran diréktèr lo FMI i gingn in bon moné tou lé moi : i fé par-la 400 foi lo smic, sinonsa 496.000 euro aproshan... Dizon, kan i pèy aou konmsa, la pa pou pans bann pèp lé plito pou pans out posh avèk sèk la sosiété ou sar frékanté..mé la pa pou arien.
Konm té ki di lanpérèr Vespasien, lo boug la mète kabiné péyan la-ba dann Rome : larzan la poin lodèr !

Justin