Matant Zélida la ékrir Justin :

Mon shèr nové, mon spès salté, rouj de fon dovan l’éternité,
An finn kont, mon nové, vi voi bien bann moun valab i divors avèk zot. Poitan, si mi tronp pa so moun-la té dakor avèk zot épi d’apré sak mi kroi té i partaz lo mèm zidé avèk zot. Pou ète lo doiyène bann dépité La Rényon i fo kant mèm la pèrsone la gingn zot bénédiksyon in bon koup de tan. Pou ranport in konba vinkèr kont Virapoullé, té i falé osi gingn zot adoubman. Parl pi tout bann sak la gingn zot parénaz pou fé parti in list zot parti. Alor, kouk la spasé toudinkou : la pa in grogn pèrsonèl rant zot ? Sansa zot téi viv a koté san viv avèk ? Dé foi sa i ariv é in zour i di arvoir Pyèr tak baro ! Sré pa étonan ksé sa ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Si ou la bien ékout sak bann PLR la di dimansh, na in n’afèr ou lé sir : zot i èm, sé zéléksyon, é zot i vé réponn prézan shak foi in zéléksyon va prézanté. Pou kosa d’apré ou ? Pa pou défann in program, pars zot la pa anparl program. Donk, sé pou gingn in post mazistra èk bann zéléktèr. Touléka, sa i vé dir zot na in for l’anbisyon pèrsonèl !
Ou va dir amoin toulmoun i fé la politik, si zot na poin in l’anbisyon, zot i sar ar pa bien loin. Mé si zot lanbisyon sé fèr dé shoz pou lo péi, pou lo pèp, sé in bon l’anbisyon. Si sé in lanbisyon pèrsonèl sé in mové lanbisyon, pars sa i pé amenn azot dann n’inport ékèl dériv, a komansé par suiv lo kouran mèm si sé pa in bon kouran.
In n’ot afèr ankor : so bann moun té koté nou dopi in bonpé d’tan, ni pansé mèm zot lété dakor èk nout bann prinsip, nout program, nout projé, alé oir non. Lé vré dé foi i fo l’tan pou romarké, i fo galman la pasyans, pars konm di lo kont : “La pasyans i guéri la gal”. Tok ! Pran sa pou ou.

 Justin