Matante Zélida la ékrir Justin :
Mon shèr nové, mon spès salté, moin lé pliské sir zot mèm, bann rouj-de-fon i doi-z’ète étoné dovan la kapasité méssyé Didier. Zot k’i domandé k’i arète kozé épi k’i komans travay po vréman, zot pé pa dir k’i travay pa. Lir zournal !Rogarde télé ! Ékout la radyo ! Tou l’tan i oi é i antann parl sak Konsèy réjyonal i fé : l’ordinatèr marmay-li ! Voiyaz l’aviyon bon marshé li ! Matignon2 li ! Toultan, toultan, i oi é i antan parl de sa. Na dé koi fèrm z’ot také la ! Tok, pran sa pou toi !


Justin la fé pou répons :
Mon vyé matant k’i koz touzour la boush rouvèr, a bon ! Pou ou, sa travay fé sa ! Pou ou sa sé travay itil ! Pou ou sa i prépar l’avnir La Rényon ! Malérèzman lé pa vré. Pou n’inporte ki, k’i rogarde lé shoz konm k’i lé sak li la fé lo pli inportan, pou l’instan, sé kassé. Parmi bann kassèr, li lé bon pou lo promyé pri. É lo pèrdan la-dan sé nout péi, sé bann Rényoné. Aprésa, kossa li la fé ? Li la komans gaspiy larzan ramassé par Paul Vergès.

Pou bate tanbour, li bate tanbour !
Solman sak ou i di lé vré ! La Réjyon Rényon la zamé gaspiy nout larzan, pou fé in propagann konm sa. Konbyin i dépans pou sa ? In zour va fé lo kont. L’èr-la, ou va oir konbyin la gaspiyé é kissa li la gonf lo pla. In zour, san tardé mi éspèr. Mé la pa sa va fé avans anou in pé. Konm di lo kont, rozoir vide i fé bonpé dézord.

Justin