Matant Zélida la ékrir justin :
Mon shèr nové, mon spès salté, rouz de fon dovan l’étèrnité,
Mi sipoz ou lé kontan i sava vot la loi pou lo mariaz omo. Mi sipoz, pou ou, lé pa inportan la mazorité d’moun lé kont sa. Mi pans, pou ou, tout bann flèv manifestan dann Pari, sa i ansèrv de riyin. Pou ou, sak i kont, sé in bann sénatèr épi in bann dépité anfèrmé dan zot palé klimatizé apré vot kont la mazorité bann Fransé... Alé azot, na in zour i apèl domin, é konm demoun i di : domin, sé in n’ot zour !

Justin la fé pou répons :
Mon vié matant k’i koz touzour la boush rouvèr,
Mi sort antann dann radio in n’afèr mi trouv lé intérésan.
I paré lo wati-watia bann moun i vé pa lo mariaz pou toulmoun i shanj pa l’opinion bann Fransé. In majorité d’moun lé pou lo mariaz pou toulmoun, mé majorité d’moun lé kont lo droi adopté. Donk, bann aboiyèr d’nuit la pa shanj arien é tout zot dézord la pa ansèrv de riyin.
Mi sort antann galman bann Fransé lé pli trakasé par lo shomaj é par zot nivo d’vi l’apré dégréné... Si sa lé vré pou la Frans, parl pi pou La Rénion, pars si la-ba nivo d’vi i dégrèn, isi la mizèr noir l’apré rogoumanté zour-an-zour. Si shomaj i goumant la-ba, dann la Frans, isi i krèv plafon. L’èr-la, mi pans lé présé gouvèrnman i okip sérièzman so bann problèm-la.

NB : Astèr, akout mon pti kozman zis pou fé ri in pé la boush. Dsi radio France-Inter, la intéroz in dépité. Banna la fé la romark la droit la vot kont tout bann loi dsi bann omo, shak foi pou koup zot droi. Lèr-la, banna la domann ali si tout bann gé té i doi vot pou la gosh. Lo boug la réponn, oui, pars pou li, in gé i vot pou la droit lé konm in dind i vot pou révéyon d’Noèl.

Justin