Kan la négosyé Matignon2, promyé minis la Frans, méssyé Fillon, kan li té i sort rékipèr dsi nou in takon milyon, la fé in konpliman Didier Robert. La félisite ali pars li sé in dir négosyatèr. Boug-la kontan ! Alé oir, Fillon té apré ri dann son koin ; La Rényon té i pèrde in tram-train dann sète afèr-la, é pou la route litoral, banna la konm oubli mark in kloz révizyon an ka k’lo pri i goumant in bonpé. Sa i vé dir, si i fé in rout dé milyar, lo sirplis sé la Réjyon k’i pèy tousèl. Pou in négosyatèr ? For, for, for pou vréman !
Kan méssyé Didier l’amèn in délégasyon la-ba Adélaïde, la Réjyon la pran déssi èl tout bann dépans : plis 140 mil éro. Lalyans fransèz la lans l’invitasyon, mé la pa mète in éro anndan ; Tanka lo minist l’Australi, li la di, pou larzan, La Rènyon na k’a fé sintir, é l’avé poin zakor konm sak Didier Robert la déklar dann zournal. In pé plis la guèr té i pète, la pa pété. Pou in négosyatèr, sé in négosyatèr bandé ! Apré sa li la ar roganiz in bat-karé Adélaïde... in fasson konm in n’ote de manz son vomi ;
An parmi tousala, la fé dor anou lé dé zyé rouvèr avèk lo projé "Bann zil Vaniy", mé pli vif, pli trète. L’èr lil Maurice té fine pran son désizyon, la Réjyon té i koz, té i koz mèm, é konm zournal de l’il i di, Maurice i fé in bon afèr é La Rényon pétète va ramas bann myète ;
Arzout èk sa léstratézi méssyé Robert pou gingn zéléksyon Konsèy zénéral ké la foiré vèy pa, i pé dir prézidan la Réjyon sé in kador pou vréman. Afors ranport bann viktoir konm sa, toute son projé va fini an lo d’boudin. Kossa zot i vé mon bann dalon, èk in koshon, konm di lo patoi, i fé pa in shoval de kours.

Konm di lo kont : « Avèk in koshon i fé pa in shoval de kours ! ».

Justin