Oté

Konm i di : afors alé a l’o, kalbas i kass

Justin / 7 novanm 2017

JPEG - 43.6 ko

Ni koné, toultan k’lé shoz sar konmsa, toultan k’lo sistèm néo-kolonyal i kart ar pa li pou lèss La Rényon dévlopé ni pé pa éspèr oir lé shoz shanjé pou vréman. Sa i vé pa dir ni pé pa oir lé shoz agravé sirtou kan in l’apranti sorsyé i pèlmèl dann nout l’ékonomi épi nout sosyété.

In l’apranti sorsyé ? Bien antandi mi vé anparl mésyé Macron. Pars si i doi apèl in sha in sha, i pé pa apèl otroman lo nouvo prézidan La Répiblik. Nou la fine oir son tourné-viré dsi la késtyonn bann z’anploi édé. Ni sava oir moi d’zanvyé 2018 lo mové l’éfé la CSG (contribusyon sosyal généralizé) épi son rogoumantasyon nora dsi lo nivo d’vi bann rotrété épi d’ot katégori sosyal.

An sans kontrèr ni apèrsoi déza bann rish apré délash z’ot sintir. I paré dann la bann nana mil i sava bénérfisyé in bon moné pou l’inpo dsi la fortine. I parétré, d’apré sak moin la lir, l’inpo i sava soulaz azot pou plis dis pour sa sak zot i pèye zordi, donk zot sava pèye kat san milyon l’éro an moins. Dsi kisa i sava tir sa d’apré zot ? Dsi sak na poin lo pourkoi bien antandi !

Zot i koné galman, lo l’alokasyon lojman i sava diminyé pars gouvèrnman i pans lé proférab, tir plizyè pti some dsi l’alokasyon lozman pou in gran kantité d’moun, ké tir dsi dé-troi nana asé l’arzan mé zot i profèr pa péyé, é zot i éstime sa sé in n’afèr normal, sa sé in n’afèr lozik é asiréman sa in kékshoz lé bon pou zot é zot i pans salévré pou toulmoun. Alé oir !

L’èrla, moin nana in sèl kozman pou dir mésyé Macron é biensir sé in provèrb, k’i di konmsa : afors alé a l’o kalbas i kass é na poin arien pou anpèsh ali kasé pars sé in loi marké dann la natir dé shoz.