Kisa la di larzan i mank ? Pito i mank lo tan pou dépansé ousinonsa lo tan trouv mwayin pou kashièt lo larzan. Shakinn néna son sousi i di. Moun pov néna son sousi pou fini lo mwa, kiswa èk son ti sédik, kiswa èk son RMI ousinonsa son find drwa, mé li an souplingn pa, an kontrèr. Moun rish néna son sousi pou kashièt son larzan, é li an souplingn. I di “Ti zanfan tit pinn, gran zanfan grann pinn“. Konm si néna ti sousi èk gro sousi.

Lé rokoni osi moun oki lé zénéré, moun rish souvan-dé-fwa lé san kèr. Zordi ni pé rann a nou kont èk lo léskandal trafik larzan. Moun oki, li partaz son mizèr. Lé vré na dé-fwa désertin moun lé san kèr. Zordi ni konpran in pé mié parkoman banna i ariv a dévir larzan sank ni konpran. Konm si lo gro sousi pou zot, sé pa koman gingn larzan, lo gro sousi sé koman fé travay limazinasyon pou kashièt larzan dann in paradi fiskal.

O lièrk invéstir larzan dan lo péi, pou donn travay domoun, lo moun rish ousinonsa lantropriz i kré son sosyété san non ayèr, konm sa li pèy pa zinpo, li blansi larzan. Mwin la vi dann télé in patron la fèrm son lantropriz, la lisansié lo pé aprésa li la anvoy 24 million dann in paradi fiskal, konm si ni zètré 10 zoro. La télé la poz késtyon lo boug an somaz zordi-kosa ou an pans de tousala ? Li la réponn “Koué ou vé, ni viv pa dan lo minm mond“.