Lo gouvérnman, konm i fé, si i kontinié konm sa va aminn a nou dirèk dann fon, son politik la finn kariaté, li ansèrv aryink zintéré lo médèf, é dikou lo médèf i di “mèt ankor na pasé“. Ziss inn ti néstan minn li la mèt lo momon la finanss o solèy, li la krétik la finanss, zordi li lé ki é shmiz èk la finanss. Tanka lo promié miniss li koz toratravèr, li mèt lo frin èk la rou sokour. Konbyin larzan la donn lantropriz, aryink 41 miliar i di, ousa i lo bann zanplwa ? Oki bourik.

Sépousa i di lo promié miniss i mèt lo frin èk la rou sokour. Dapré zot, kisa i koz konm sa kont lo gouvérman zordi ? In zopozan ? Nou noré di lé normal vik li la vot kont, shakinn i zoué son mizik. Bann syndika ? Zot i zoué zot rol, normal osi vik banna la lèv an guèp kont lo prozé d’lwa si lo kod di travay. Pou lo kou, an misouk, pou lo kod di travay, néna i di minm Sarkosy noré pa oz alé osi lwin.

Dann zot parti minm désértin i fé kou d’san i di “ranpli pi, lo vèr lé plin, i débord“. Pa ninport dé ki i di sa, bann gran manitou sosyalis minm. Bann an o. Néna i di minm si lo dio Hollande-Valls i kontinié la politik konm i lé zordi, déza provwa in gro bézman pou 2017 é an pliss la frans i riskab tonm féblèss domin. Fo krwar banna té rousté pou vréman pou sort in kozman parèy.