Aprésa néna ankor inn dé sharzèr d’lo pou promèt a nou la linn,30 000 anplwa par isi, 50 000 par laba, kado pou noèl, parl pi. Apré bann zatanta la sominn dérnyèr, lo prézidan la répiblik la di “Ti pé larzan i rèss va ansèr aryink pou la sékirité dan la frans“ pou rokrit bann polisié pou argard bann zij, pou bann gardyin prizon pou mwayéné larmé tousala. Pou lé zot boudikont konm kréol i di odrémié pou lèr, argard dann in trou. Fasil a konprann, vik larzan lé rar konm korn lapin.

Sanm pou mwin si i ansèrv larzan pou fé la guér, find’kont va mank ayèr. Kisa i siportra ankor plis lé konsékans de tousala ? Gramoun i di “lo pis i mont touzour d’si shyin mèg“. Sa lé valab pou nou isi. Ni rokoné nou ké nout péi la touzour èt a la trinn, kiswa pou lékol, kiswa pou nout dévlopman, kiswa pou nout transpor, kiswa pou nout lagrikiltir tousala. Dopi lo tan ni di, i fo fé in gran ratrapaz pou nou, vik ziska zordi nou lé an rotar konm mi di la bon o.

Néna i di, lo moman té zis bon pou komans okip pou vréman nout ratrapaz la. Nout kamarad Paul la di dan son konférans de prèss zedi, li la di konm sa “la gèr kont lo téroris va romèt tout an koz la Rényon“. Li di konm sa larzan va ansèrv pou la gèr sra larzan va mank a nou la Rènyon. Konm nou la plis bozwin, konm nou lé plis mèg ké tout, ni pé di “konm ni sava la, lo pis sar touzour d’si shyin mèg“ !