Zot i koné kisa yèr matin moin la antann dann radyo ? Zot i dovine pa a-popré ? Lo boug lété shèf-an-tèt dan lo mouvman kont la Réjyon kan Paul Vergès lété prézidan ? Oui ! li mèm, lo mésyé Mongin. Té antann pi ali ditou, é estèr, kan lo mouvman lé fini, li ariv, épi li fé son komantatèr konm in l’ékspèr. Anfin, sa sé pou l’anèkdot, sinploman pou dir, inn an parmi bann résponsab difikilté nout péi lé la. Mi pans banna la di bien rékonpans ali pou lo travay bien fé ; solon li, solon mésyé Didier, solon gouvèrnman épi lo préfé té la dann tan-la, nou, Rényoné, nou la pankor fini pèy lo po kasé.

Boudikont, dan in n’afèr konmsa, tan myé pou bann konsomatèr va pèy kinz éro boutèy lo gaz. Tanpi pou bann konsomatèr la pa gingn in bès l’ésans. Mésyé préfé la di, i goumant ar pa moi d’mars... Dakor, mé kosa promyé avril va aport pou nou ? Ni koné pa, mé sar pa in poison, asiréman. L’èr-la mésyé préfé va vni ésplik anou gasparin-briné ala pou kosa l’ésans la goumanté. Pa solman l’ésans malérèzman, tout bann marshandiz la goumanté épi bann gro zoizo va vni dir anou zot i fé lo méyèr posib é zot i gingn pa. La marj i sifi pa ! Pétèt zot i pans, dsi nout fron lé marké "kouyon" ?

Pou mon par, mi pans, lé bien ésèy fé diminyé bann pri. Lé bien lité pou k’i goumant in pé l’arzan bann ti-kolon. Lé bien, é sak i fé sa, lé vré, li l’apré lit kont la mizèr. Solman, sa in bout la solisyon ; pars l’ot bout la solisyon lé dan lo travay, lé dann in vré travay. La solisyon pou in vré travay lé dan nout dévlopman, l’ésploitasyon kolonyal i ral déyèr dépi lo komansman nout l’istoir. Si i fé pa lo dévlopman, mèm si i gingn arash in n’afèr tazantan, moin la bien pèr sa lé riskab èt konm in cautère dsi in zanm do boi.

 Justin