Mi sort lir dann nout zournal samdi sak in ga Sin-Dni i pans dsi program Gironcel, pars na inn-dé kartyé Sin-Dni lé dann sirkonskripsyon niméro sis, l’androi Maurice i prézant. Li di : « Lo program lé éksélan. Sé in vré shanjman. I di bann shoz vré. Program-la va fé l’anploi pou bann Rényoné. Tram-trin, sa in bon n’afèr pou La Rényon ». Moin osi mi pans konmsa dsi program Gironcel, mé galman dsi sète tout bann kandida nout parti i prézant dan z’éléksyon dépité.

Solman i fo bien ni koné in n’afèr : biensir bann kandida i prézant zot program, mé sa bann militan la fé program-la épi bann kandida la invite tout demoun, sak i vé, pou anrishi lo program, aport zot pyèr pou fabrik nout mézon. Sa sé in bon z’afèr ! Pou kosa ? Pars la pa solman bann politisien la fé bann program-la. Bann militan la mète la min ansanm. Mèm sak lé pa militan la mète la min ansanm. Arzout èk sa, lo program té pa fé in sèl zour, dopi in bonpé z’ané i travay la dsi.

Pétète in moun lé pa dan nout part i pé kroir arienk bann dirijan la fé sa. Biensir bann dirijan la fé lo travay nou té i atann de zot. Mé zot lété pa tousèl pou fé travay-la. Konm moin la di an-o la, shakinn la done son l’idé, é son l’idé plis sète lé zot plis sète lé zot ankor la mète ansanm pou fé in program demoun La Rényon i vé pou vréman. Lé sir, bann gran zournal, bann télé, in bann radyo i fé pa konète nout program. Pars zot i pans zot lé pa la pou sa. Pli pir, in pé i déform lo program. In pé i gaskone ali ? Sa nou lé abityé. Solman, zot i vé zot i vé pa, nout program lé éksélan, konm in ga Sin-Dni la di.

 Justin