Médam, zé Méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo vré masson.

Mézami, mi koné pa zot, mé mwin lé pa rar dann in sossyété mi koné pa koman i fonkssyone mwin lé pa alèz. La manyèr demoune i fé i mète amwin dann la difikilté. Mwin lé a d’madé si i fo kozé sa,sa pa kozé, fé lo promyé pa sansa pa fé lo promyé pa, di in parol sansa pa di. Anfin pou dir azot la vérité, mwin lé konm in grin d’bébé dann in panyé mayi.

O fète mi panss zot i koné grin d’bébé ? Sa i pouss dsi lo bor la rivyèr, préférabloman dann galé .Li done in pti frui lé roz kan lémir, lé dou sansa in pé ègrélé, mé noué tan marmaye, nou téi manz sa. E lomoun lainvante kozman-la ? Mwin la antande sa dann la boush Alain Armand sak la fé in diksyonèr Kréol-rényoné touzour koté mon klavyé kan mi ékri.

Alé ! Mi arète tèr-la mé konm d’abitide mi invite azot rofléshi lo kozman mwin la marke an-o la é ni artrouv pli d’van, sipétadyé.