Mi pouré pa dir azot pou kosa, mé tout lo trikmardaz l’apré spassé dopi dè-troi zour i fé pans amoin Nicole Robinet de La Serve, in gran pèrsonaz l’istoir La Rényon. Mi pans zot osi zot i koné a li kansréti par lo diskour Auguste Lacaussade la pronons dsi son tonm dann simztyèr Sint-André, pou son antèrman.

Kosa moun-la la fé ? Zis dé pti mo pars sré tro long pou lo pti modékri moin la désid fé zordi. Figuir azot kan bann z’anglé la atak La Rényon, Robinet de le Serve la pran lé z’arm. Kan l’ariv l’ané 1815, li lété fine ariv dan La Frans é avèk in bann jenn son l’az li la pran ankor in kou lé z’arm pou défann La Frans.

L’ané 1830 li té La Rényon é li la form avèk in bann dalon in sosyété sogrète : « Bann franc Kréol » pou li doman k’i fé lé réform lété nésésèr dann tan-la. Lé vré banna té i domann pa, dann z’ot program l’abolisyon l’ésklavaz mé d’apré sak moin la lir dsi de La Serve, li lété pou l’abolisyon… Mi pans in pé i sava mord amoin la dsi mé la pa si grav.

Donk Robinet de La Serve téi di li nana dé patri : La Frans bien sir é osi La Rényon – Bourbon si zot i vé ! Sa sé in kékshoz i bote amoin pou vréman pars mi pans la pa moin solman k’i rosan lé shoz konmsa. Pou kosa mi pans ali zordi, pliské d’abitid ? Moin la trouvé. Sé pars, pou moin sa in bon prinsip é si nou l’avé pran sa konm shomin galizé nou n’ora pa été, konm moin na l’inprésyon zordi, pou in pé, in konsyans égaré.