Malérozman, lé a popré sir si ni kontinié konm sa, na bat dann mir pou do vré, vik ni ariv pi o bout. Dané an ané nout sityasyon i aranz pa, plito na di i agrav, kiswa nout ka pérsonèl pou désertin, kiswa pou nout péi an zénéral. Boudikon lé fasil konprann, i sifi koz in pé rantronou, shakin i an souplingn é tout lé in pé inkié pou domin. Si ni pran lo ka in plantèr zordi, sé in vré kass tèt sinwa pou li. Zordi pou la plipar, lo gro rovni sé kann.

Souvan dé fwa néna a koté inn ti plantasyon d’léguim, mé pou fé viv la famyi li kont plis d’si son kann. A lèr ki lé, li kontinié plant kann ousinonsa li arash tout ? Ki i pé fé in paryaz zordi d’si lavnir nout kann ? Na pwin inn, minm bann désidèr i profèr kashiété pou pa réponn. La zordi ni koz pou kann, aprésa domin, ni pé koz pou travay, nout lékol osi fodra in zour an awar in bon réfléksyon la d’si. La politik lozman ? koman ni sar fé pou loz tousa d’moun ?

Tanto, mwa d’mars, nora swasant dizan nou lé départman fransé èk la lwa di 19 mars 1946. Swa-dizan té pou mèt a nou minm égal èk la frans. Dopi tan la ni atann. Lo SMIG égal-égal èk banna, nou la atann ziska 1996, lo RMI égal-égal nou la atann ziska 2002. Sé konm sa kan 1988 si mi tronp pa, ni nyabou arash légalité sosyal. Si lavé pwin lo parti kominis konm lanspèk, sanm pou mwin zordi ni té atann ankor !