Lot zour moin tapré parl la nostalzi… Albert Camus, ékrivin filizof alzériin, kan mi lir a li koué i évok a moin dan mon vi, mon péi, mon fami, la povreté tousala.
Na in lekspresyon fransé i parl « le sentiment du déjà vécu ». Souvan, zot osi, pa riink moin, zot la du fine romarké, din kou, i pas in nafèr rapid dan out tèt, oui di ou oui pans : « mé moin na linpresyon moin la fine viv sa !? » I pé èt dan in konversasyon,in zest, in aksyon ou lapré fé.

A moin, zordi, mi arfé sertin zaktivité mon bann paran, sirtou mon papa té i fé sa, 365 zour si 365 ; mon papa lé mor ; moin na dzanfan koté moin ; mi arvoi mon papa dan moin é moin dan mon bann zanfan. Mi pans zot i réaliz inn ti pé ;ma pran dé troi zégzanp.
In zour mi voi lo zié mon vié – lo zié droit - ék in gran tré rouz dan lo blan ; mi sort lékol ; mi dmann a li sé koué sa : « sa sé in brans ver la fouèt a moin si lo koté, moin la pa giny évité… » la lo zié i res rouz o moin 15 zour ! Zordi konbiinn foi moin la fayi trap in kou d brans kakasi pareiy…

Mon vié té i lav son dé min in manièr… zordi mi artrouv lo minm zest : frot dési, dédan, doi par doi, si lo koté… lo dé pié osi avann mont si d li koté monmon ; dann kivèt - lontan nou té i di bandez - in pié i frot lot, lo min i arviin asèv sa ; ankor komé la nou na servièt ; lontan sifon n pié…
San konté kan ou la pré travay dann boi, lo ti féiy i sort an lèr i rant toultan dan out zié ; blésir, boi pointi i plis out bra, i singny…
Ki kalité soufrans nout bann zansèt la pasé, san krié, san pléré, san domandé siouplé ; zot bann konba minm politik. I fo zordi nou na in respé.
Konm in nafèr ou la fine viv é ki roviin !

 Justin