La koup kann i avans avèk lo tan. I tard pa sar fini é konm i di so zour-la, viv la koup 2017 ! Viv la koup 2017 ? Sa lé a oir malorèzman pars l’ané proshène pi d’kota, pi d’pri garanti. Kosa bann plantèr va fèr, kosa bann transportèr va fèr ? Kosa lo dizui mil pèrsone i travaye an la la kann va fèr. Final de kont, pèrsone i koné pa ziska zordi : nou lé dann brouyar san pour san...

Dann désèrtin péi l’arète plant kann zour pou landmin. La-ba dann bannzil Hawaï té i plant in kantité kann é zordi na pi arien. Na d’ot zandroi la prodiksyon la diminyé, diminyé é afors diminyé la disparète près pou la totalité.

Oui mé, zot va dir amoin, néna in loi dsi l’égalité réèl i paré i sava voté donk i fo li okip in n’afèr konmsa ! Ziska zordi i paré sa sé in n’afèr li pran pa kont. Konm li pran pa kont bann trété l’Erop la sign avèk in bann péi, in danzé d’mor pou nout prodiksyon intèryèr... Si mi tronp pa ! Si mi tronp pa lé pli proférab pa okip bann problèm ou i gingn pa okipé épi tras-konm i di-in plan dsi la komète.

Dopi lontan l’apré balad anou konmsa é d’apré sak mi oi lo tik-tak i kontinyé. Nou lé konm in malad : nou lé pa bien par plas é nou lé bien par plas. Nout parti la mète in nom dsi maladi-la, li la apèl sa lo nouvo kolonyalis épi li la propoz sak li apèl son solisyon a diskité… Mé la plipar d’moun bien, sa i korsh z’ot lang konm in gro mo é pou la solisyon, lé parèy, na poin vréman é konm mi di souvan sa i ansèrv konm in pansman dsi in zanm de boi.